鄭秀文（Sammi）昨晚在紅館舉行第2場「#FOLLOWMi 世界巡迴」演唱會，請了曾傳有心病的李蕙敏（Amanda）做嘉賓，以行動破冰。90年代兩女上位爭天后傳不和，早前Amanda重提舊事說：「當時我冇同Sammi鍊，大家咁諗啫，其實係自己做自己嘢，同邊個都冇乜交流。」
不和傳聞傳足20多年，昨晚Sammi開騷就請了Amanda，Sammi邊唱《默契》邊介紹Amanda出場，合唱後Sammi稱與Amanda大約30年前同期出道，Amanda笑言：「大家都係童星！」更大讚Sammi弗到爆，又伸手摸她的腹肌「驗證」。
Sammi還問Amanda與外籍老公夫妻相處秘密：「我成日都好好奇，你咪嫁咗個老外，有時傾心事點傾呢？我哋廣東話好地道㗎嘛，例如『今日真係㷫過火屎！』咁點翻譯？」Amanda指會用「fire」、「Super Angry」表達極級嬲嬲豬，Sammi笑着亂講一通：「My heart burning fire shit！」Amanda自爆：「我有時嬲起上嚟真係叫佢『eat shit and die』，佢咪笑囉！呢啲咁港式英文，佢都唔明。」Sammi說：「所以話愛情呢啲嘢，不用多語言，其實只係識 Hi 同 Bye都結到婚，其他嘢用愛搭夠。」跟着Amanda拖住Sammi手示範：「仲有動作嘅……『Goodnight，kiss kiss』咁就得㗎啦！」Sammi無眼睇：「真係好冤氣！」
此外，Sammi昨晚穿上超短熱褲在台上晒完美股肌：「我好努力咁食、好努力健身，終於畀我搞到有少少『蜜桃Pat』……而家興呀！」她更揭起褲腳邊露出pat pat曲線，全場瘋狂尖叫！
演唱會結束後，Sammi約凌晨12時離開紅館，由於仍有大批歌迷在場守候，Sammi熱烈打招呼，亦有走近幫fans簽名，大約幾分鐘後才離開。
(資料來源：網上截圖/連結)
